Impenji tal-Kor Nativitas ghal Zmien il-Milied 2012

Il-Kor Nativitas ser ikun impenjat b'diversi impenji korali f'numru ta' ċelebrazzjonijiet liturġiċi relatati ma' Żmien il-Festi tal-Milied 2012. Dawn l-impenji huma kif ġej:

It-Tlieta 25 ta' Diċembru: Solennita' tat-Twelid ta' Sidna Ġesu' Kristu (Il-Milied).

9.15am: Servizz ta' kant ta' għanjiet tradizzjonali tal-Milied (carol singing) fil-Knisja tal-Patrijiet Franġiskani Konventwali tal-Belt Victoria.

9.30am: Konċelebrazzjoni Solenni fl-istess Knisja.

L-Erbgħa 26 ta' Diċembru: Mis-7.30pm 'il quddiem: Attivita' soċjali għall-membri tal-Kor.

Il-Ħadd 30 ta' Diċembru: Festa tal-Familja Mqaddsa ta' Ġesu', Marija u Ġużeppi (is-Sagra Familja).

9.30am: Il-Kor Nativitas janima Quddiesa Kantata fil-Knisja ta' San Franġisk.

It-Tnejn 31 ta' Diċembru: L-Aħħar Jum tas-Sena Ċivili.

6.30pm: Il-Kor Nativitas janima l-Quddiesa Konċelebrata ta' ringrazzjament lil Alla fi tmiem is-Sena Ċivili. Din il-Quddiesa Solenni tagħlaq bil-Kant tat-Te Deum. 

It-Tlieta 1 ta' Jannar: Solennita' ta' Marija, Omm Alla.

9.15am: Servizz ta' kant ta' għanjiet tradizzjonali tal-Milied (carol singing) fil-Knisja tal-Patrijiet Franġiskani Konventwali tal-Belt Victoria.

9.30am: Konċelebrazzjoni Solenni fl-istess Knisja.

Il-Ħadd 6 ta' Jannar: Solennita' tal-Epifanija tal-Mulej.

9.15am: Servizz ta' kant ta' għanjiet tradizzjonali tal-Milied (carol singing) fil-Knisja tal-Patrijiet Franġiskani Konventwali tal-Belt Victoria.

9.30am: Konċelebrazzjoni Solenni fl-istess Knisja li matulha jitħabbru l-festi prinċipali tal-Knisja għas-sena 2013. 

Nieħdu din l-okkażjoni biex nawguraw lil kulħadd Milied Hieni u 

Sena Ġdida mimlija b'kull riżq u hena!!

Il-Kor Nativitas irodd ħajr lil Alla flimkien ma’ erba’ saċerdoti Għawdxin

Nhar l-Erbgħa 27 ta’ Ġunju 2012, il-Kor Nativitas kien mistieden sabiex janima Quddiesa Solenni ta’ Radd il-Ħajr lil Alla fl-okkażjoni tal-ħamsa u għoxrin anniversarju mill-Ordinazzjoni Saċerdotali ta’ Dun Gerard Buhagiar, ir-Rettur preżenti tas-Santwarju Nazzjonali tal-Madonna Ta’ Pinu, Dun Alex Refalo, Dun Anton Attard u Dun Mikiel Xuereb. L-Ordinazzjoni ta’ dawn is-saċerdoti kienet saret fil-Knisja Katidrali ta’ Marija Assunta fl-1987 minn idejn l-E.T. Mons. Isqof Nikol Ġ. Cauchi.

Il-Quddiesa ta’ Radd il-Ħajr lil Alla ġiet iċċelebrata fis-Santwarju Nazzjonali tal-Madonna Ta’ Pinu fl-okkażjoni tad-disa’ Erbgħa bi tħejjija għall-Għid tal-Assunta u bdiet fil-5.30pm. Il-Kor Nativitas esegwixxa diversi innijiet liturġiċi relatati ma’ din l-okkażjoni. Il-Quddiesa ġiet imxandra wkoll fuq Radju Marija għall-benefiċċju tal-morda u l-anzjani li ma setgħux joħorġu minn djarhom.

Sadanittant, matul ix-xahar ta’ Lulju, il-Kor qed jiltaqa’ regolarment sabiex iħejji ruħu għall-Programm Vokali u Strumentali mtella’ mis-Soċjeta’ Filarmonika Victory fil-jiem tal-festa titulari ta’ Marija Bambina. Aktar dettalji jingħataw fil-ġimgħat li ġejjin. Nieħdu din l-okkażjoni biex nawguraw lil kulħadd Sajf ta’ mistrieħ!

Il-Kor Nativitas jipparteċipa fil-Festa tal-Madonna ta’ Pinu

Nhar il-Ġimgħa 22 ta’ Ġunju 2012, fid-Djoċesi ta’ Għawdex, ġiet iċċelebrata l-Festa tal-129 Anniversarju mis-Sejħa tal-Madonna Ta’ Pinu lil Carmela Grima.

 

Din it-tifkira li tiġi ċċelebrata kull sena tfakkarna fis-sejħa ‘Ejja... Ejja’ li l-Verġni Marija għamlet lil din ix-xbejba twajba mir-raħal tal-Għarb li kienet iżżur b’mod regolari l-kappella ċkejkna li kien hemm fl-imwarrab f’dawn l-inħawi. Din il-kappella illum ġiet trasformata f’Santwarju Marjan li huwa ċentru nazzjonali ta’ devozzjoni u kult lejn il-Verġni Marija.

 

Il-Pontifikal Solenni tat-8pm tmexxa mill-E.T. Mons. Ġużeppi Mercieca, Arċisqof Emeritus ta’ Malta, bis-sehem ta’ numru sabiħ ta’ saċerdoti Għawdxin. Mons. Mercieca kien qed irodd ħajr lil Alla u lill-Verġni Marija f’għeluq is-sittin anniversarju mill-Ordinazzjoni Saċerdotali tiegħu. Għal sena oħra, il-Kor Nativitas ġie mistieden mir-Rettur tas-Santwarju, il-W.R. Dun Gerard Buhagiar, sabiex janima din iċ-ċelebrazzjoni. Il-Kor kanta l-Quddiesa Gregorjana ‘Missa De Angelis’ alternata mal-kongregazzjoni flimkien ma’ diversi innijiet liturġiċi oħra.

 

Is-servizz li jmiss ser ikun nhar l-Erbgħa 27 ta’ Ġunju fis-Santwarju Nazzjonali tal-Madonna Ta’ Pinu fejn fil-5.30pm ser tiġi ċċelebrata Quddiesa ta’ Radd il-Ħajr lil Alla mir-Rettur Dun Gerard Buhagiar fl-okkażjoni ta’ għeluq il-Ġublew il-Fidda mill-Ordinazzjoni Presbiterali tiegħu. Inħeġġukom tattendu!

 

Il-festa ta’ Sant’Antnin ta’ Padova

Għal sena oħra, il-Kor Nativitas ġie mistieden mill-Komunita’ tal-Patrijiet Franġiskani tal-Belt Victoria sabiex janima l-Quddiesa Solenni f’jum il-festa ta’ Sant’Antnin ta’ Padova li ġiet iċċelebrata nhar l-Erbgħa 13 ta’ Ġunju 2012. Il-Quddiesa tal-5pm tmexxiet mill-E.T. Mons. Isqof Mario Grech u kienet tinkludi l-preżentazzjoni tat-tfal u t-trabi lil Sant’Antnin, il-Qaddis tal-Mirakli.

Il-Kor esegwixxa diversi innijiet liturġiċi fosthom ‘L-Għanja tal-Ħolqien’ (Introjtu), ‘Imbierek Int Mulejja’ (Offertorju), ‘Ġbartna flimkien Mulej’ (Tqarbin) u l-Innu popolari lil Sant’Antnin ta’ Padova (Għeluq) flimkien mal-‘Missa Pastorale’ ta’ Mro. Nazzareno Refalo. Iċ-ċelebrazzjoni ntemmet bit-tqassim tal-ħobż tradizzjonali ta’ Sant’Antnin.

Is-servizz li jmiss huwa nhar il-Ġimgħa 22 ta’ Ġunju 2012 fit-8.00pm fis-Santwarju Nazzjonali tal-Madonna Ta’ Pinu fl-okkażjoni tal-festa tas-Sejħa tal-Madonna lil Carmela Grima. Il-Pontifikal Solenni ser jitmexxa mill-Arċisqof Emeritus Mons. Ġuzeppi Mercieca fl-okkazjoni tas-60 Anniversarju mill-Ordinazzjoni Saċerdotali tiegħu.

Il-Kor Nativitas janima s-Solennitajiet liturġiċi tal-Mulej

Il-Kor Nativitas kompla għaddej bl-impenji tiegħu permezz ta’ diversi servizzi li huwa kellu fil-Knisja tal-Patrijiet Franġiskani Konventwali tal-Belt Victoria. Il-Kor anima l-Quddiesa kantata tad-9.30am fis-Solennitajiet liturġiċi ta’ Żmien il-Għid u dawk ta’ wara. Dawn huma Lapsi, Għid il-Ħamsin, it-Trinita’ Qaddisa u l-Korpus.

Għal din l-okkażjoni, il-Kor kanta diversi innijiet liturġiċi li jixirqu għal kull okkażjoni. Il-Kor kien akkumpanjat fuq l-orgni mill-organista Ivan Attard.

Il-Kor Nativitas b'servizz fis-Santwarju Nazzjonali tal-Madonna Ta' Pinu

Nhar l-Erbgħa 16 ta' Mejju 2012, il-Kor Nativitas ġie mistieden mill-W.R. Dun Gerard Buhagiar, Rettur tas-Santwarju Nazzjonali tal-Madonna Ta' Pinu, sabiex janima l-Quddiesa Solenni tat-8pm fl-okkazjoni tat-tielet Erbgħa bi tħejjija spiritwali għas-Solennita' tal-Assunzjoni tal-Verġni Marija. 

Din il-Quddiesa kienet waħda speċjali tant li ġiet ippreseduta mill-E.T. Mons. Isqof Mario Grech flimkien ma' diversi saċerdoti Għawdxin. Fuq stedina tal-Kurja Djoċesana, kien hemm ukoll prezenti numru ta' fratellanzi tal-Madonna minn xi parroċċi Għawdxin. Wara li ntemmet il-Quddiesa, Mons. Isqof mexxa t-talba tar-Ruzarju u inawgura l-Konsultorju tal-Familja - ċentru qrib is-Santwarju tal-Madonna Ta' Pinu li ser jibda jintuza biex minnu jingħataw pariri legali, amministrattivi, mediċi, psikoloġiċi u finanzjarji lil dawk il-familji li jkunu f'diffikulta'. 

Fl-omelija tiegħu għal din l-okkazjoni, Mons. Isqof qal li dan il-Konsultorju huwa investiment li qed tagħmel id-Djoċesi ta' Għawdex b'rizq il-familja u huwa zieda mas-servizzi li toffri d-Djoċesi permezz tal-Kummissjoni Familja u strutturi oħra fi ħdanha biex il-familja, li hija l-benniena tas-soċjeta' Maltija, tkompli tissaħħaħ. 

 

Il-Kor Nativitas f’Sant’Anton għall-Kwaranturi Mqaddsa

Fuq stedina tal-W.R. Kan. Dun Ġwann Sultana, Rettur tal-Knisja ta’ Sant’Anton Abbati fix-Xagħra, il-Kor Nativitas anima bil-Kant il-Quddiesa Solenni tat-Tieni Jum tal-Kwaranturi Solenni fl-istess Knisja. Din il-Quddiesa ġiet iċċelebrata nhar is-Sibt 12 ta’ Mejju 2012 fis-7pm.

Iċ-ċelebrazzjoni tal-Ewkaristija kienet immexxija minn Patri Ugolin Xerri OFM Konv., assistit mir-Rettur il-Kan Dun Ġwann Sultana u l-Kan. Dun Ġwann Bartolo. L-innijiet li ġew esegwiti kienu dawn: ‘Misteru Kbir tal-Fidi’ (Introjtu), ‘Irrid nieħu sehem’ (Offertorju) u ‘Kull Ħin Imbierek Ismu’ (Tqarbin) flimkien mal-‘Missa Pastorale’ ta’ Mro. Nazzareno Refalo. Fi tmiem il-Quddiesa, tkanta l-Innu Ewkaristiku ‘Nirien ta’ Mħabba’ waqt li saret l-Espożizzjoni ta’ Ġesu’ fl-Ewkaristija u ngħatat il-Barka Sagramentali.

Wara l-Quddiesa, il-membri tal-Kor ġew mistiedna għal trattament tal-okkażjoni fis-sagristija tal-istess Knisja.

Il-Kor Nativitas janima l-funeral ta’ Ewkaristiku Sultana (1940 - 2012)

Fuq xewqa tal-familjari tiegħu, il-Kor Nativitas ġie mistieden sabiex janima l-Quddiesa tal-funeral ta’ ħuna Ewkaristiku Sultana li għadda għall-ħajja ta’ dejjem nhar is-Sibt 5 ta’ Mejju fl-Isptar Ġenerali ta’ Għawdex fl-eta’ ta’ 71 sena. Mart Ewkaristiku, Ġuża, hija waħda mill-koristi regolari tal-Kor tagħna.

Il-funeral ta’ ħuna Ewkaristiku sar nhar it-Tlieta 8 ta’ Mejju. Il-Quddiesa, li bdiet fil-5pm, kienet immexxija mill-W.R. Kan. Dun Ġużepp Cini bis-sehem ta’ diversi saċerdoti mill-Parroċċa tax-Xagħra u anke minn barra r-raħal. Waqt il-Quddiesa, il-Kor esegwixxa diversi innijiet reliġjużi adattati għal din l-okkażjoni. Flimkien mal-Kor Nativitas ħadet sehem ukoll is-Sopran Rita Dimech li interpretat l-innijiet Pie Jesu’ fl-Offertorju, Ave Verum Corpus fit-Tqarbin u Ħa Nersqu LejH waqt il-bews tal-Kurċifiss fuq it-tebut.

Il-Quddiesa kienet segwita mill-aħħar korteo lejn iċ-ċimiterju parrokkjali tax-Xagħra fejn saret id-difna fil-qabar tal-familja.

Agħtih O Mulej il-mistrieħ ta’ dejjem, id-dawl ta’ dejjem jiddi lilu,

jistrieħ fil-paċi. Amen!

Servizzi tal-Kor fil-granet li gejjin

Dawn huma s-servizzi li ghandu l-Kor Nativitas ghall-granet u l-gimghat li gejjin:

It-Tlieta 8 ta' Mejju: 

5.00pm: Il-Kor janima l-Quddiesa tal-Funeral ta' Eucharist Sultana fil-Knisja Bazilika ta' Marija Bambina (Xaghra). 

Is-Sibt 12 ta' Mejju:

7.00pm: Il-Kor janima l-Quddiesa tat-Tieni Jum tal-Kwaranturi Solenni fil-Knisja ta' Sant'Anton Abbati, Xaghra.

Il-Hadd 20 ta' Mejju: Solennita' ta' Lapsi.

9.30am: Il-Kor janima l-Koncelebrazzjoni Solenni ta' Jum Lapsi fil-Knisja ta' San Frangisk t'Assisi, Victoria.

Il-Hadd 27 ta' Mejju: Solennita' ta' Ghid il-Hamsin.

9.30am: Il-Kor janima l-Koncelebrazzjoni Solenni ta' Jum Ghid il-Hamsin fil-Knisja ta' San Frangisk t'Assisi, Victoria.

Il-Hadd 3 ta' Gunju: Solennita' tat-Trinita' Qaddisa.

9.30am: Il-Kor janima l-Koncelebrazzjoni Solenni tat-Trinita' Qaddisa fil-Knisja ta' San Frangisk t'Assisi, Victoria. 

Il-Hadd 10 ta' Gunju: Solennita' tal-Gisem u d-Demm tal-Mulej (Il-Korpus). 

9.30am: Il-Kor janima l-Koncelebrazzjoni Solenni tal-Korpus fil-Knisja ta' San Frangisk t'Assisi, Victoria.

L-Erbgha 13 ta' Gunju: Festa ta' Sant'Antnin ta' Padova.

5.00pm: Il-Kor janima l-Quddiesa tal-festa ta' Sant'Antnin fil-Knisja ta' San Frangisk t'Assisi, Victoria.

Dan is-sit elettroniku jzommkom aggornati bl-andament ta' dawn is-servizzi kollha. Grazzi.

 

Il-Kor Nativitas jipparteċipa fil-Festa ta’ San Ġużepp fix-Xagħra

Fuq stedina ta’ Mons. Arċipriet Carmelo Refalo, il-Kor Nativitas għal sena oħra ħa sehem attiv fil-festa devota ta’ San Ġużepp fil-Parroċċa tax-Xagħra.

Id-devozzjoni lejn San Ġużepp fir-raħal tagħna tmur lura għal ħafna snin. Meta fl-1692 il-Parroċċa tax-Xagħra bdiet tiffunzjoni mill-Knisja ddedikata lit-Twelid tal-Verġni Marija, missirijietna Xagħrin, b’għaqal kbir, għażlu lil San Ġużepp biex ikun il-Kon-Patrun tal-Parroċċa. Għalhekk, id f’id ma’ Marija Bambina, San Ġużepp iħares il-Parroċċa tagħna minn kull għawġ. Id-devozzjoni lejn dan il-Qaddis kompliet tissaħħaħ meta fl-1879, sitt snin biss wara l-miġja tal-istatwa titulari ta’ Marija Bambina, waslet fostna l-istatwa artistika ta’ San Ġużepp maħduma għand id-ditta rinomata Galard et Fils ta’ Marsilja fi Franza. Din l-istatwa qanqlet fervur qaddis l-aktar minħabba l-ħlewwa li l-iskultur irnexxielu joħloq fil-figura ta’ San Ġużepp u tat-tfajjel Ġesu’. Għal xi żmien, il-festa parrokkjali ta’ San Ġużepp kienet tiġi ċċelebrata fl-Ottava tal-Għid pero’, peress li l-Liturġija għandha restrizzjonijiet kbar marbuta ma’ din l-Ottava, il-festa ġiet trasferita għall-ewwel Ħadd ta’ Mejju.

It-Tridu Solenni ta’ San Ġużepp beda nhar l-Erbgħa 2 u ntemm nhar il-Ġimgħa 4 ta’ Mejju 2012. Iċ-ċelebranti kienu l-Arċipriet Emeritus Mons. Ewkaristiku Sultana, Mons. Anton Refalo Zammit u Mons. George Farrugia rispettivament filwaqt li l-omeliji mimlija tagħlim attwali dwar San Ġużepp saru minn Patri Ugolin Xerri li huwa membru assidwu tal-Komunita’ tal-Patrijiet Franġiskani Konventwali tal-Belt Victoria. Waqt il-Quddies tat-Tridu, ġew esegwiti bosta innijiet liturġiċi mill-Kor Nativitas bis-sehem sħiħ tal-assemblea li nġabret biex tipparteċipa f’din il-festa Ġużeppina. Kull Quddiesa kienet tiġi fi tmiemha bil-Kant tal-Antifona Exsurgens Josef (mużika ta’ Mro. Nazzareno Refalo), Barka Sagramentali u l-Kant tal-Innu popolari ‘Lil San Ġużepp, Kon-Patrun tax-Xagħra’ (mużika ta’ Mro. Mikiel Farrugia).

Il-Kor Nativitas kien akkumpanjat fuq l-orgni tal-Bażilika mid-Direttur tiegħu, l-organista Ivan Attard.

Il-Kor Nativitas fil-festa ta’ San Ġużepp fix-Xagħra

Il-Kor Nativitas għadu kemm ġie mistieden sabiex janima l-Liturġija fit-Tridu Solenni tal-Festa Sekondarja ta’ San Ġużepp fil-Knisja Kolleġġjata u Bażilika ta’ Marija Bambina fix-Xagħra bejn l-Erbgħa 2 u l-Ġimgħa 4 ta’ Mejju 2012.

Din is-sena, l-omelija tat-Tridu dwar San Ġużepp ser isiru mill-W.R. Patri Ugolin Xerri OFM Konv. Il-Quddiesa Konċelebrata tat-Tridu tibda fis-7.00pm u tkun imxandra b’mod dirett fuq Radju Bambina (98.3 FM).

Il-Kor Nativitas jieħu din l-okkażjoni biex jawgura l-festa t-tajba lill-Ġużeppini Xagħrin kollha!

Christus Resurrexit sicut dixit... Alleluia! Alleluia!

Il-kant sublimi tal-Alleluia flimkien mad-daqq ferrieħi tal-qniepen tal-Knejjes tagħna sellmu lill-għodwa sabiħa tal-Ħadd 8 ta’ April 2012, Jum l-Għid il-Kbir, hekk kif il-Knisja Universali ċċelebrat b’Solennita’ qaddisa l-Qawmien tal-Mulej mill-Imwiet – il-misteru li huwa l-pedament u ċ-ċentru tal-Fidi Nisranija.

Għall-ħames darba f’temp ta’ ġimgħa, il-membri tal-Kor Nativitas animaw il-Liturġija fil-Knisja ta’ San Franġisk waqt Quddiesa Konċelebrata tal-Għid il-Kbir li kienet immexxija mill-W.R. Patri Eġidju Mizzi OFM Konv u li bdiet fid-9.30am. Għal din l-okkażjoni, il-Kor esegwixxa diversi innijiet sagri relatati ma’ dan iż-Żmien Qaddis li jfakkar ir-rebħa ta’ Kristu fuq il-mewt u fuq id-dnub. Permezz ta’ dan is-servizz, il-Kor temm l-impenji tiegħu marbuta mal-funzjonijiet tal-Ġimgħa Mqaddsa 2012 u issa jkompli jħares ‘il quddiem b’ottimiżmu lejn aktar servizzi li jagħmlu unur lilu u lis-Soċjeta’ Filarmonika Victory li lilha l-Kor jirrapreżenta.

Matul dawn il-funzjonijiet kollha, il-Kor Nativitas kien immexxi u akkumpanjat fuq l-orgni mid-Direttur tiegħu, l-organista Ivan Attard. Inħeġġukom tibqgħu aġġornati bis-servizzi li fihom ser jipparteċipa l-Kor fil-ġimgħat u x-xhur li ġejjin permezz ta’ dan is-sit elettroniku.

Il-Kor Nativitas fil-Vġili Solenni tal-Għid il-Kbir

Nhar is-Sibt 7 ta’ April 2012, Sibt il-Għid, il-Kor Nativitas ħa sehem fiċ-Ċelebrazzjoni tal-Vġili Solenni tal-Qawmien tal-Mulej mill-Imwiet li, skont l-Isqof għaref Santu Wistin, hija l-‘Omm tal-Vġejjel kollha’. Infatti, il-vġili tal-Għid il-Kbir hija ikkunsidrata bħala l-aktar ċelebrazzjoni importanti li għandha l-Knisja Kattolika fil-kalendarju tal-festi liturġiċi tagħha.

Il-Vġili tal-Għid bdiet fit-8.00pm bit-tberik tan-nar barra l-bibien tal-Knisja u l-mixegħla tal-Blandun li huwa simbolu ta’ Kristu Rxoxt. Mad-dħul fil-Knisja, Patri Eġidju Mizzi OFM Konv. kanta t-Tħabbira Solenni tal-Għid li kienet segwita mill-Qari ta’ seba’ lezzjonijiet meħuda mit-Testment il-Qadim u l-Kant tal-Glorja li matulu sar id-daqq tal-qniepen. Il-qniepen kienu ilhom siekta mill-Glorja tal-Quddiesa ta’ Ħamis ix-Xirka filgħaxija. Il-Quddiesa Solenni tal-Lejl Qaddis tal-Għid kompliet bil-Liturġija tal-Magħmudija, it-tiġdid tal-Wegħdiet tal-Magħmudija, it-traxxix tal-ilma imbierek fuq il-poplu u l-Liturġija tal-Ewkaristija.

Għal din l-okkażjoni, il-Kor Nativitas esegwixxa diversi innijiet fosthom ir-ritornelli tas-Salmi Responsorjali tal-Qari tal-Quddiesa, ir-responsorju ‘Faħħru għejun il-Mulej’, l-antifona 'Rajt l-Ilma ħiereġ mit-Tempju', il-'Gloria In Excelsis Deo' ta' T. Lecot u l-'Qaddis' ta' M. Palmitessa. Flimkien mal-Kor ħadet sehem ukoll is-Sopran Rosabelle Pavia li interpretat l-innijiet ‘Kristu Qam mill-Mewt’ (Offertorju) u ‘Ħa Nersqu LejH’ (Tqarbin) bħala solista. Bħala innu tal-għeluq, sar 'Jesus Christ You Are My Life' alternat bejn il-Kor u s-solista. Fi tmiem il-Quddiesa, il-koristi kienu mistiedna mill-Komunita’ Franġiskana għal agape tal-okkażjoni.

F’isem l-amministrazzjoni u d-direzzjoni tal-Kor Nativitas, nixtiequ nawguraw GĦID QADDIS lil kulħadd!

Jum il-Mewt Glorjuża tal-Mulej

Iċ-ċelebrazzjonijiet solenni marbuta mat-Tridu Mqaddes tal-Għid komplew f’jum il-Ġimgħa l-Kbira permezz tal-Azzjoni Liturġika li, fil-Knisja ta' San Franġisk, bdiet fit-3pm u kienet immexxija minn Patri Ġorġ Attard OFM Konv.

Il-funzjoni liturġika tat-tlieta bdiet bil-Qari tal-Lezzjonijiet tal-Quddiesa, il-Kant tas-Salm Responsorjali u anke r-Rakkont tal-Passjoni tal-Mulej skont l-Evanġelista San Ġwann. Dan il-qari kien segwit minn omelija qasira flimkien mat-talbiet ta’ interċessjoni li, waqt din iċ-ċelebrazzjoni, isiru fi stil differenti minn dak tas-soltu. Il-qofol ta’ din il-funzjoni ntlaħaq permezz tal-Adorazzjoni tal-Għuda tas-Salib Imqaddes li matulha sar il-kant tal-innijiet ‘O Poplu tiegħi’, 'Fik Kristu l-Maħfra Tagħna' u ‘Ġesu’ tiegħi’. Il-lettur qara wkoll numru ta’ improperji u salmi adatti għal waqt dan ir-rit sagru. Iċ-ċelebrazzjoni kompliet bit-Tqarbin Imqaddes li matulu sar il-kant tal-innu ‘O Ġesu’ tal-Akbar Ħniena’ u ntemmet fis-skiet li jitlob minna dan il-jum qaddis. Il-funzjoni ġiet fi tmiemha fl-4.20pm. Il-Knisja issa tkompli tishar ħdejn il-qabar tal-Mulej midfun filwaqt li tistenna b’ħerqa kbira l-mument tar-rebħa tiegħu fuq il-mewt u d-dnub.

Intant, aktar tard matul il-jum, il-Banda Victory tax-Xagħra ħadet sehem fil-Purċissjoni tal-Ġimgħa l-Kbira li ħarġet mill-Knisja Kolleġġjata u Bażilika ta’ Marija Bambina fis-6.00pm u mxiet matul it-toroq 28 ta’ April 1688, San Ġużepp, Bullara, Jannar u Pjazza l-Vitorja sakemm irritornat lura fil-Knisja għall-ħabta tad-9.00pm.

L-impenji tal-Kor Nativitas marbuta mal-jiem tal-Ġimgħa Mqaddsa jkomplu nhar is-Sibt 7 ta’ April fil-Velja Solenni tal-Għid il-Kbir.

Jingħata bidu għat-Tridu Mqaddes tal-Għid

Nhar il-Ħamis 5 ta’ April, Ħamis ix-Xirka, il-Knisja Universali tat bidu għat-Tridu Solenni tal-Għid biċ-ċelebrazzjoni tal-Aħħar Ikla tal-Mulej.

Din iċ-ċelebrazzjoni tfakkar l-Aħħar Ikla li Ġesu’ għamel mal-Appostli tiegħu awl il-lejl qabel ma kien ittradut, miċħud u msallab ma’ salib għas-salvazzjoni ta’ ruħna. Nhar Ħamis ix-Xirka, il-Knisja tfakkar it-twaqqif ta’ żewġ Sagramenti kbar: l-Ordni Sagri u l-Ewkaristija Mqaddsa. Il-Quddiesa ta’ Ħamis ix-Xirka filgħaxija hija l-unika Quddiesa li tiġi ċċelebrata fil-Knejjes tagħna f’dan il-jum hekk kif matul in-nofs ta’ nhar ta’ filgħodu tiġi ċċelebrata biss Quddiesa waħda fil-Knisja Katidrali li matulha s-saċerdoti preżenti jġeddu l-wegħdiet li kienu għamlu f’jum l-Ordinazzjoni tagħhom filwaqt li l-Isqof ibierek iż-Żjut Imqaddsa.

Fil-Knisja ta’ San Franġisk fir-Rabat Għawdex, il-Quddiesa ta’ Ħamis ix-Xirka bdiet fis-6.30pm u kienet immexxija mill-W.R. Patri Joe Xerri OFM Konv., Gwardjan, flimkien mal-Komunita’ Franġiskana. Waqt din iċ-ċelebrazzjoni, ġiet esegwita l-Missa De Angelis (Gregorjana) bis-sehem tal-poplu. Ġew ukoll kantati l-innijiet ‘Ġbartna Flimkien Mulej’ (introjtu), ‘Ubi Caritas et Amor’ (ħasil tar-riġlejn), ‘Fejn Issib l-Imħabba u l-Għożża’ (Offertorju) u ‘Waslet is-Siegħa’ (Tqarbin). Fi tmien din iċ-ċelebrazzjoni, Ġesu’ Ewkaristija ġie meħud proċessjonalment mill-Altar Maġġur tal-Knisja għall-Altar tar-Repożizzjoni (magħruf b’mod popolari bħala s-Sepulkru) waqt il-Kant tal-Innu ‘Agħti lsien l-oħla foħrija’ u ‘Dal-Misteru Għarkobbtejna’. Flimkien mal-Kor Nativitas ħadet sehem ukoll is-Sopran Rosabelle Pavia. Hekk ġiet fi tmiemha din iċ-ċelebrazzjoni li tat bidu għat-Tridu Mqaddes tal-Għid.

Il-funzjoni li jmiss hija l-Azzjoni Liturġika tal-Ġimgħa l-Kbira li tinkludi r-rit tal-Adorazzjoni tal-Għuda tas-Salib. Din tibda fit-3pm.

F’Ħadd il-Palm u l-bidu tal-Ġimgħa Mqaddsa

Il-Kor Nativitas kompla għaddej bl-impenji numerużi tiegħu fil-festi tal-Ġimgħa Mqaddsa li jilħqu l-qofol tagħhom biċ-ċelebrazzjoni tal-Misteru tal-Passjoni, il-Mewt u l-Qawmien ta’ Sidna Ġesu’ Kristu.

Nhar Ħadd il-Palm, il-Kor fetaħ il-Ġimgħa Mqaddsa b’servizz fil-Knisja tal-Patrijiet Franġiskani Konventwali tal-Belt Victoria fejn għal sena oħra ġie mistieden sabiex janima dawn iċ-ċelebrazzjonijiet solenni. Ftit qabel id-9.30am sar ir-rit tat-tberik tal-palm u ż-żebbuġ fuq iz-zuntier tal-Knisja li tmexxa minn Patri Ugolin Xerri OFM Konv. Dritt wara, saret il-purċissjoni bis-Salib Rebbieħ madwar is-salib tal-pjazza faċċata tal-Knisja segwita minn Quddiesa Konċelebrata li matulha nqara r-Rakkont tal-Passjoni tal-Mulej.

Għal din l-okkażjoni, il-Kor esegwixxa diversi innijiet liturġiċi adatti fosthom ‘Fik Kristu l-Maħfra tagħna’, ‘Kollni kemm jien’ u ‘Lill-Madonna tad-Dmugħ’ flimkien mal-‘Quddiesa tal-Poplu t’Alla’, mużika ta’ Patri Albert Cachia OSA.

Il-Kor Nativitas issa jkompli jipparteċipa fiċ-ċelebrazzjonijiet tat-Tridu Mqaddes tal-Għid li jibda nhar il-Ħamis 5 ta’ April bil-Quddiesa Solenni ta’ Ħamis ix-Xirka filgħaxija li tibda fis-6.30pm u li tinkludi r-rit tal-ħasil tar-riġlejn u tintemm bit-translazzjoni tas-Santissimu Sagrament lejn l-Altar tar-Repożizzjoni fejn Ġesu’ jkun adurat u meqjum mill-insara. Flimkien mal-Kor Nativitas ser tieħu sehem ukoll is-Sopran Għawdxija, Rosabelle Pavia.

Il-Kunċert tal-Ġimgħa Mqaddsa

Il-Kor Nativitas fetaħ l-impenji tiegħu marbuta maċ-ċelebrazzjonijiet tal-Ġimgħa Mqaddsa billi ipparteċipa fil-Programm ta’ Mużika Sagra mtella’ mis-Soċjeta’ Filarmonika Victory fil-Knisja Kolleġġjata u Bażilika ta’ Marija Bambina fix-Xagħra.

Waqt dan il-Kunċert ġie mfakkar il-25 Anniversarju mill-mewt tas-Sur Ġorġ Cini, ko-fundatur tal-Banda Victory flimkien mal-memorji ta’ erba’ bandisti li għaddew għal ħajja oħra f’dawn l-aħħar seba’ snin: Mikieli Refalo (Settembru 2005), Carmel Vella (Diċembru 2009), Franġisk Bonello (Jannar 2011) u Ġużeppi Grima (Novembru 2011). Il-Kor ħa sehem f’dan il-Programm annwali billi kanta Preghiera mill-Opra Mose’ ta’ Giacomo Puccini u anke l-Innu ‘Quddiem Ġesu’ Imsallab’, versi ta’ Mons. Mikelanġ Apap u kompożizzjoni tas-Surmast Vincenzo Ciappara.

Il-Kor Nativitas issa jkompli b’aktar servizzi fil-Knisja tal-Patrijiet Franġiskani Konventwali tal-Belt Victoria fiċ-ċelebrazzjonijiet tal-Ġimgħa Mqaddsa.

Id-Direttur mużikali tal-Kor Nativitas jipparteċipa fl-ewwel edizzjoni tal-‘Gozo Organ Festival’

Riċentement, id-Direttur Mużikali tal-Kor Nativitas, Ivan Attard, ipparteċipa fl-ewwel edizzjoni tal-Gozo Organ Festival li ġie organizzat mid-Dipartiment tal-Kultura fi ħdan il-Ministeru għal Għawdex. Din l-edizzjoni kienet tikkonsisti f’serje ta’ attivitajiet li saru fi Knejjes differenti bejn il-Ġimgħa 16 u l-Ħadd 18 ta’ Marzu 2012.

Ivan Attard ipparteċipa billi daqq xi xogħlijiet qosra fuq l-orgni tas-Santwarju Nazzjonali tal-Madonna Ta’ Pinu u anima l-Quddiesa tal-10.00am ta’ Jum il-Mulej li kienet immexxija mill-W.R. Mons. Joe Bezzina u li kienet imxandra b’mod dirett fuq Radju Marija għall-benefiċċju tal-morda u l-anzjani li ma jistgħux joħorġu minn djarhom.

Id-Direttur mużikali tal-Kor Nativitas twieled fl-1989 fix-Xagħra Għawdex. Huwa beda jistudja l-pjanu sa minn eta’ żgħira fejn irnexxielu jakkwista ċ-ċertifikat ta’ Grade 8 f’Solo Piano Performance u Grade 8 fit-Teorija tal-Mużika. F’Jannar 2011, taħt il-gwida ta’ Mro. Joseph Grech, Ivan irnexxielu jakkwista l-Associate Diploma tat-Trinity College of London. Fil-preżent, Ivan huwa l-organista residenti fis-Santwarju Nazzjonali tal-Madonna Ta’ Pinu fejn janima l-Liturġija fil-Ħdud u anke fil-Knisja tal-Patrijiet Franġiskani Konventwali tal-Belt Victoria fejn jieħu ħsieb l-animazzjoni liturġika mużikali fil-festi prinċipali tal-Knisja. Ivan huwa wkoll organista f’diversi Knejjes Għawdxin. Minbarra li jdoqq l-orgni, huwa wkoll bandist mal-Banda Victory tax-Xagħra fejn idoqq it-tenor saxophone u Direttur mużikali tal-Kor Nativitas tal-istess Soċjeta’. Fil-preżent, Ivan qed ikompli japprofondixxi l-istudji mużikali tiegħu billi qed jitgħallem il-vjolin. Ivan Attard jaħdem bħala Assistant Principal mal-Kunsill Lokali tax-Xagħra.

L-amministrazzjoni tal-Kor Nativitas tixtieq tawgura aktar suċċessi lid-Direttur Ivan Attard A.MusTCL fil-karriera mużikali tiegħu!

L-impenji tal-Kor Nativitas fil-festi tal-Gimgha Mqaddsa

Għal sena oħra, il-Kor Nativitas ser ikun impenjat b'għadd sabiħ ta' servizzi relatati maċ-ċelebrazzjonijiet tal-Ġimgħa Mqaddsa fil-Knisja tal-Patrijiet Franġiskani Konventwali tal-Belt Victoria.

L-ewwel impenn tal-Kor għal dawn il-jiem għeżież ser ikun nhar is-Sibt 31 ta' Marzu 2012 fil-Kunċert ta' Mużika Sagra li ser ittella' l-Banda Victory fil-Knisja Kolleġġjata u Bażilika ta' Marija Bambina mit-8pm 'il quddiem. Il-Kor ser jieħu sehem billi jkanta fil-Preghiera mill-Opera 'Mose' ta' Giacomo Puccini u fl-Innu 'Quddiem Ġesu' Imsallab', kompożizzjoni ta' Mro. Vincenzo Ciappara.

L-impenji tal-Kor fil-funzjonijiet tal-Ġimgħa Mqaddsa fil-Knisja ta' San Franġisk ikomplu kif ġej:

Il-Ħadd 1 ta' April: Ħadd il-Palm.
9.30am: Tberik tal-Palm u ż-Żebbuġ fuq iz-zuntier tal-Knisja, Purċissjoni bis-Salib Rebbieħ u Quddiesa Konċelebrata li matulha jinqara r-Rakkont tal-Passjoni tal-Mulej.

Il-Ħamis 5 ta' April: Ħamis ix-Xirka.
6.30pm: Konċelebrazzjoni Solenni li tfakkar it-twaqqif tal-Ewkaristija Mqaddsa u li tinkludi r-Rit tal-Ħasil tar-Riġlejn u t-translazzjoni tas-Santissimu Sagrament lejn l-Artal tar-Repożizzjoni (Is-Sepulkru).

Il-Ġimgħa 6 ta' April: Il-Ġimgħa l-Kbira.
3.00pm: Azzjoni Liturġika li tinkludi l-Qari tar-Rakkont tal-Passjoni tal-Mulej, l-Adorazzjoni tas-Salib u t-Tqarbin.

Is-Sibt 7 ta' April: Sibt il-Għid.
8.00pm: Vġili Solenni tal-Għid il-Kbir - Tberik tan-nar, Tħabbira Solenni tal-Għid, Liturġija tal-Kelma, Kant tal-Glorja, Tberik tal-Ilma, Liturġija tal-Magħmudija u Liturġija Ewkaristika.

Il-Ħadd 8 ta' April: Ħadd il-Għid.
9.30am: Konċelebrazzjoni Solenni.

Waqt dawn il-funzjonijiet, il-Kor Nativitas ser ikun immexxi u akkumpanjat fuq l-orgni mid-Direttur Mużikali tiegħu, Ivan Attard A.MusTCL. Dan is-sit elettroniku tal-Kor Nativitas ser ikompli jwassal rappurtaġġ dettaljat tal-attivitajiet kollha li ser jieħu sehem fihom il-Kor matul il-jiem tal-Ġimgħa Mqaddsa. Nieħdu din l-okkażjoni biex nawguraw l-Għid it-tajjeb lil kulħadd!

Il-Kor Nativitas fil-bidu tar-Randan Imqaddes

Nhar l-Erbgħa 22 ta’ Frar 2012, il-Knisja Kattolika tat bidu għal erbgħin jum ta’ talb, sawm u karita’ bi tħejjija għaċ-ċelebrazzjoni tal-Misteru tal-Għid il-Kbir. Dawn l-erbgħin jum huwa replika tal-erbgħin jum li Ġesu’ għadda fid-deżert fejn kien ittentat mix-xitan.

Il-Kor Nativitas ġie mistieden mill-komunita’ tal-Patrijiet Franġiskani Konventwali tal-Belt Victoria sabiex janima ċ-ċelebrazzjoni tal-Erbgħa tal-Irmied fil-Knisja ta’ San Franġisk. Waqt din iċ-ċelebrazzjoni, il-Kor esegwixxa diversi innijiet liturġiċi ta’ Żmien ir-Randan flimkien mal-‘Quddiesa tal-Poplu t’Alla’. Waqt it-tqegħid tal-irmied li huwa sagramental użat mill-Knisja Kattolika f’Ras ir-Randan, il-Kor kanta l-innu ‘Kollni kemm jien’. Iċ-ċelebrazzjoni ntemmet bil-kant tal-innu ‘Lill-Madonna tad-Dmugħ’ b’tifħir lill-Verġni Marija Addolorata.

Il-Kor Nativitas issa jibda l-preparamenti tiegħu għall-Kunċert ta’ mużika Sagra li ser ittella’ s-Soċjeta’ Filarmonika Victory fil-Knisja Bażilika ta’ Marija Bambina nhar is-Sibt 31 ta’ Marzu u ċ-ċelebrazzjonijiet marbuta mal-Ġimgħa Mqaddsa bejn il-Ħadd 1 ta’ April (Ħadd il-Palm) u l-Ħadd 8 ta’ April (L-Għid il-Kbir).

Il-Kor Nativitas jagħti servizz fil-Knisja ta’ Marsalforn

Fuq stedina tal-W.R. Kan. Dun Mikiel Borg, Rettur tal-Knisja ta’ San Pawl f’Marsalforn, il-Kor Nativitas anima l-Quddiesa Konċelebrata ta’ Lejliet is-Solennita’ Liturġika tan-Nawfraġju tal-Appostlu Missierna San Pawl nhar il-Ħamis 9 ta’ Frar 2012.

Il-festa tal-10 ta’ Frar hija waħda mis-Solennitajiet prinċipali fil-Kalendarju liturġiku tal-Knisja Maltija għax tfakkar il-Magħmudija ta’ gżiritna u l-wasla tal-Fidi Nisranija fuq art twelidna. Il-Knisja ta’ Marsalforn hija ddedikata lin-Nawfraġju tal-Appostlu tal-Ġnus f’Malta. Il-Knisja preżenti ġiet ikkonsagrata mill-Isqof Mikiel Gonzi fit-12 ta’ Settembru 1939. L-istatwa titulari ta’ San Pawl inħadmet mill-istatwarju Għawdxi Wistin Camilleri fl-1925. Il-kwadru titulari tpitter mill-pittur Malti Giuseppe Bonnici.

Il-Quddiesa ta’ lejliet in-Nawfraġju ta’ San Pawl tmexxiet mir-Rettur ta’ Marsalforn, il-Kan. Dun Mikiel Borg. Fil-5.30pm sar ukoll il-Kant tal-Ewwel Għasar segwit mir-reċita tal-Kurunella u Barka Sagramentali. Matul il-Quddiesa, il-Kor Nativitas esegwixxa bosta innijiet liturġiċi fosthom l-Innu taċ-Ċentinarju Pawlin miktub fl-1960 minn Mro. Joseph Abela Scolaro. Il-Kor kien akkumpanjat fuq l-orgni mill-organista Ivan Attard.

Il-Festa tal-Għerusija tal-Madonna

Nhar is-Sibt 21 ta’ Jannar 2012, fis-Santwarju Nazzjonali tal-Madonna Ta’ Pinu, ġiet iċċelebrata l-Festa devozzjonali tal-Għerusija tal-Madonna ma’ San Ġużepp. Din id-devozzjoni kien bdieha t-twajjeb Franġisk Mercieca, magħruf b’mod popolari bħala ‘Frenċ tal-Għarb’ u baqgħet tinżamm b’għożża kbira matul is-snin.

Il-Kor Nativitas ġie mistieden mir-Rettur tas-Santwarju, il-W.R. Dun Gerard Buhagiar, sabiex janima l-Ewkaristija ta’ din il-festa li bdiet fis-6.30pm u li kienet immexxija mill-E.T. Mons. Isqof Mario Grech. Għal din l-okkażjoni, il-Kor esegwixxa diversi innijiet liturġiċi: ‘Misteru Kbir tal-Fidi’ (Introjtu), ‘Mulej Ħniena’ (N. Refalo), ‘Gloria in Excelsis Deo’ (T. Lecot arr. Dion Buhagiar), ‘Mulej Ġejna Qrib Artalek’ (Offertorju), ‘Qaddis’ (M. Palmitessa), Ħaruf t’Alla (N. Refalo), ‘Kull Ħin Imbierek Ismu’ (Tqarbin) u ‘Ismagħha l-Għanja’ (innu tal-għeluq). Fi tmiem din il-Quddiesa, tqassmu l-perlini assoċjati ma’ din il-festa.

Is-servizz li jmiss tal-Kor Nativitas huwa skedat għal nhar il-Ħamis 9 ta’ Frar 2012 f’Marsalforn fl-okkażjoni tas-Solennita’ tan-Nawfraġju tal-Appostlu Missierna San Pawl. Il-Quddiesa Konċelebrata tibda fis-6pm.

Is-Solennita’ tal-Epifanija tal-Mulej

Il-Kor Nativitas temm l-impenji tiegħu relatati mal-festi tal-Milied u l-Ewwel tas-Sena billi anima l-Liturġija tas-Solennita’ tal-Epifanija tal-Mulej – il-ġrajja li fiha nfakkru l-wasla tat-tliet Slaten Maġi li marru mill-bogħod biex jaduraw lill-Mulej u joffrulu d-doni tagħhom ta’ deheb, inċens u mirra.

Fid-9.30am, il-Kor Nativitas anima l-Quddiesa Solenni li tmexxiet minn Patri George Attard. Kif inhi t-tradizzjoni antika fil-Knisja, wara l-Qari tal-Evanġelju, tħabbru l-festi li jimxu mal-Għid. Il-Kor kien akkumpanjat fuq l-orgni mid-Direttur mużikali u organista, Ivan Attard.

Il-Kor Nativitas jagħlaq is-sena 2011 u jiftaħ is-sena 2012 mal-Komunita’ Franġiskana

Il-Kor Nativitas kompla għaddej b’numru sabiħ ta’ impenji marbuta ma’ żmien il-Milied permezz ta’ aktar servizzi fil-Knisja tal-Patrijiet Franġiskani Konventwali tal-Belt Victoria.

Nhar is-Sibt 31 ta’ Diċembru, l-Aħħar Jum tas-Sena Ċivili, il-Kor Nativitas anima l-Quddiesa Konċelebrata tas-6.30pm li kienet immexxija mill-W.R. Patri Joseph Xerri OFM Konv., Gwardjan tal-Komunita’, bis-sehem tal-komunita’ Franġiskana. Kif inhi t-tradizzjoni, fi tmiem din il-Quddiesa, ġie kantat it-Te Deum bħala innu ta’ Radd il-Ħajr lil Alla għall-grazzji li sawwab fuqna matul is-sena li qed tintemm.

L-għada l-Ħadd, 1 ta’ Jannar, l-ewwel jum tas-sena l-ġdida 2012, il-Kor Nativitas reġa’ għal darb’oħra anima l-Quddiesa kantata tas-Solennita’ Liturġika ta’ Marija, Omm Alla. Fid-9.15am ingħata bidu għal servizz ta’ kant ta’ għanjiet tradizzjonali tal-Milied segwit minn Quddiesa Konċelebrata fid-9.30am.

L-aħħar impenn tal-Kor għal dan l-istaġun tal-festi tal-Milied ikun nhar il-Ħadd li ġej, 8 ta’ Jannar 2012, Solennita’ tal-Epifanija tal-Mulej. Fid-9.30am issir Quddiesa Solenni fil-Knisja ta’ San Franġisk. Sadanittant, il-koristi ser ikollhom ikla ta’ dawn il-festi nhar il-Ħamis 5 ta’ Jannar mis-7.00pm ‘il quddiem f’ristorant lokali.

Nieħdu din l-okkażjoni biex nawgurawlkom minn qalbna Sena ġdida mimlija b’kull riżq, hena u barka mis-sema!