Id-Direttur mużikali tal-Kor Nativitas jipparteċipa fl-ewwel edizzjoni tal-‘Gozo Organ Festival’

Riċentement, id-Direttur Mużikali tal-Kor Nativitas, Ivan Attard, ipparteċipa fl-ewwel edizzjoni tal-Gozo Organ Festival li ġie organizzat mid-Dipartiment tal-Kultura fi ħdan il-Ministeru għal Għawdex. Din l-edizzjoni kienet tikkonsisti f’serje ta’ attivitajiet li saru fi Knejjes differenti bejn il-Ġimgħa 16 u l-Ħadd 18 ta’ Marzu 2012.

Ivan Attard ipparteċipa billi daqq xi xogħlijiet qosra fuq l-orgni tas-Santwarju Nazzjonali tal-Madonna Ta’ Pinu u anima l-Quddiesa tal-10.00am ta’ Jum il-Mulej li kienet immexxija mill-W.R. Mons. Joe Bezzina u li kienet imxandra b’mod dirett fuq Radju Marija għall-benefiċċju tal-morda u l-anzjani li ma jistgħux joħorġu minn djarhom.

Id-Direttur mużikali tal-Kor Nativitas twieled fl-1989 fix-Xagħra Għawdex. Huwa beda jistudja l-pjanu sa minn eta’ żgħira fejn irnexxielu jakkwista ċ-ċertifikat ta’ Grade 8 f’Solo Piano Performance u Grade 8 fit-Teorija tal-Mużika. F’Jannar 2011, taħt il-gwida ta’ Mro. Joseph Grech, Ivan irnexxielu jakkwista l-Associate Diploma tat-Trinity College of London. Fil-preżent, Ivan huwa l-organista residenti fis-Santwarju Nazzjonali tal-Madonna Ta’ Pinu fejn janima l-Liturġija fil-Ħdud u anke fil-Knisja tal-Patrijiet Franġiskani Konventwali tal-Belt Victoria fejn jieħu ħsieb l-animazzjoni liturġika mużikali fil-festi prinċipali tal-Knisja. Ivan huwa wkoll organista f’diversi Knejjes Għawdxin. Minbarra li jdoqq l-orgni, huwa wkoll bandist mal-Banda Victory tax-Xagħra fejn idoqq it-tenor saxophone u Direttur mużikali tal-Kor Nativitas tal-istess Soċjeta’. Fil-preżent, Ivan qed ikompli japprofondixxi l-istudji mużikali tiegħu billi qed jitgħallem il-vjolin. Ivan Attard jaħdem bħala Assistant Principal mal-Kunsill Lokali tax-Xagħra.

L-amministrazzjoni tal-Kor Nativitas tixtieq tawgura aktar suċċessi lid-Direttur Ivan Attard A.MusTCL fil-karriera mużikali tiegħu!

L-impenji tal-Kor Nativitas fil-festi tal-Gimgha Mqaddsa

Għal sena oħra, il-Kor Nativitas ser ikun impenjat b'għadd sabiħ ta' servizzi relatati maċ-ċelebrazzjonijiet tal-Ġimgħa Mqaddsa fil-Knisja tal-Patrijiet Franġiskani Konventwali tal-Belt Victoria.

L-ewwel impenn tal-Kor għal dawn il-jiem għeżież ser ikun nhar is-Sibt 31 ta' Marzu 2012 fil-Kunċert ta' Mużika Sagra li ser ittella' l-Banda Victory fil-Knisja Kolleġġjata u Bażilika ta' Marija Bambina mit-8pm 'il quddiem. Il-Kor ser jieħu sehem billi jkanta fil-Preghiera mill-Opera 'Mose' ta' Giacomo Puccini u fl-Innu 'Quddiem Ġesu' Imsallab', kompożizzjoni ta' Mro. Vincenzo Ciappara.

L-impenji tal-Kor fil-funzjonijiet tal-Ġimgħa Mqaddsa fil-Knisja ta' San Franġisk ikomplu kif ġej:

Il-Ħadd 1 ta' April: Ħadd il-Palm.
9.30am: Tberik tal-Palm u ż-Żebbuġ fuq iz-zuntier tal-Knisja, Purċissjoni bis-Salib Rebbieħ u Quddiesa Konċelebrata li matulha jinqara r-Rakkont tal-Passjoni tal-Mulej.

Il-Ħamis 5 ta' April: Ħamis ix-Xirka.
6.30pm: Konċelebrazzjoni Solenni li tfakkar it-twaqqif tal-Ewkaristija Mqaddsa u li tinkludi r-Rit tal-Ħasil tar-Riġlejn u t-translazzjoni tas-Santissimu Sagrament lejn l-Artal tar-Repożizzjoni (Is-Sepulkru).

Il-Ġimgħa 6 ta' April: Il-Ġimgħa l-Kbira.
3.00pm: Azzjoni Liturġika li tinkludi l-Qari tar-Rakkont tal-Passjoni tal-Mulej, l-Adorazzjoni tas-Salib u t-Tqarbin.

Is-Sibt 7 ta' April: Sibt il-Għid.
8.00pm: Vġili Solenni tal-Għid il-Kbir - Tberik tan-nar, Tħabbira Solenni tal-Għid, Liturġija tal-Kelma, Kant tal-Glorja, Tberik tal-Ilma, Liturġija tal-Magħmudija u Liturġija Ewkaristika.

Il-Ħadd 8 ta' April: Ħadd il-Għid.
9.30am: Konċelebrazzjoni Solenni.

Waqt dawn il-funzjonijiet, il-Kor Nativitas ser ikun immexxi u akkumpanjat fuq l-orgni mid-Direttur Mużikali tiegħu, Ivan Attard A.MusTCL. Dan is-sit elettroniku tal-Kor Nativitas ser ikompli jwassal rappurtaġġ dettaljat tal-attivitajiet kollha li ser jieħu sehem fihom il-Kor matul il-jiem tal-Ġimgħa Mqaddsa. Nieħdu din l-okkażjoni biex nawguraw l-Għid it-tajjeb lil kulħadd!

Il-Kor Nativitas fil-bidu tar-Randan Imqaddes

Nhar l-Erbgħa 22 ta’ Frar 2012, il-Knisja Kattolika tat bidu għal erbgħin jum ta’ talb, sawm u karita’ bi tħejjija għaċ-ċelebrazzjoni tal-Misteru tal-Għid il-Kbir. Dawn l-erbgħin jum huwa replika tal-erbgħin jum li Ġesu’ għadda fid-deżert fejn kien ittentat mix-xitan.

Il-Kor Nativitas ġie mistieden mill-komunita’ tal-Patrijiet Franġiskani Konventwali tal-Belt Victoria sabiex janima ċ-ċelebrazzjoni tal-Erbgħa tal-Irmied fil-Knisja ta’ San Franġisk. Waqt din iċ-ċelebrazzjoni, il-Kor esegwixxa diversi innijiet liturġiċi ta’ Żmien ir-Randan flimkien mal-‘Quddiesa tal-Poplu t’Alla’. Waqt it-tqegħid tal-irmied li huwa sagramental użat mill-Knisja Kattolika f’Ras ir-Randan, il-Kor kanta l-innu ‘Kollni kemm jien’. Iċ-ċelebrazzjoni ntemmet bil-kant tal-innu ‘Lill-Madonna tad-Dmugħ’ b’tifħir lill-Verġni Marija Addolorata.

Il-Kor Nativitas issa jibda l-preparamenti tiegħu għall-Kunċert ta’ mużika Sagra li ser ittella’ s-Soċjeta’ Filarmonika Victory fil-Knisja Bażilika ta’ Marija Bambina nhar is-Sibt 31 ta’ Marzu u ċ-ċelebrazzjonijiet marbuta mal-Ġimgħa Mqaddsa bejn il-Ħadd 1 ta’ April (Ħadd il-Palm) u l-Ħadd 8 ta’ April (L-Għid il-Kbir).

Il-Kor Nativitas jagħti servizz fil-Knisja ta’ Marsalforn

Fuq stedina tal-W.R. Kan. Dun Mikiel Borg, Rettur tal-Knisja ta’ San Pawl f’Marsalforn, il-Kor Nativitas anima l-Quddiesa Konċelebrata ta’ Lejliet is-Solennita’ Liturġika tan-Nawfraġju tal-Appostlu Missierna San Pawl nhar il-Ħamis 9 ta’ Frar 2012.

Il-festa tal-10 ta’ Frar hija waħda mis-Solennitajiet prinċipali fil-Kalendarju liturġiku tal-Knisja Maltija għax tfakkar il-Magħmudija ta’ gżiritna u l-wasla tal-Fidi Nisranija fuq art twelidna. Il-Knisja ta’ Marsalforn hija ddedikata lin-Nawfraġju tal-Appostlu tal-Ġnus f’Malta. Il-Knisja preżenti ġiet ikkonsagrata mill-Isqof Mikiel Gonzi fit-12 ta’ Settembru 1939. L-istatwa titulari ta’ San Pawl inħadmet mill-istatwarju Għawdxi Wistin Camilleri fl-1925. Il-kwadru titulari tpitter mill-pittur Malti Giuseppe Bonnici.

Il-Quddiesa ta’ lejliet in-Nawfraġju ta’ San Pawl tmexxiet mir-Rettur ta’ Marsalforn, il-Kan. Dun Mikiel Borg. Fil-5.30pm sar ukoll il-Kant tal-Ewwel Għasar segwit mir-reċita tal-Kurunella u Barka Sagramentali. Matul il-Quddiesa, il-Kor Nativitas esegwixxa bosta innijiet liturġiċi fosthom l-Innu taċ-Ċentinarju Pawlin miktub fl-1960 minn Mro. Joseph Abela Scolaro. Il-Kor kien akkumpanjat fuq l-orgni mill-organista Ivan Attard.

Il-Festa tal-Għerusija tal-Madonna

Nhar is-Sibt 21 ta’ Jannar 2012, fis-Santwarju Nazzjonali tal-Madonna Ta’ Pinu, ġiet iċċelebrata l-Festa devozzjonali tal-Għerusija tal-Madonna ma’ San Ġużepp. Din id-devozzjoni kien bdieha t-twajjeb Franġisk Mercieca, magħruf b’mod popolari bħala ‘Frenċ tal-Għarb’ u baqgħet tinżamm b’għożża kbira matul is-snin.

Il-Kor Nativitas ġie mistieden mir-Rettur tas-Santwarju, il-W.R. Dun Gerard Buhagiar, sabiex janima l-Ewkaristija ta’ din il-festa li bdiet fis-6.30pm u li kienet immexxija mill-E.T. Mons. Isqof Mario Grech. Għal din l-okkażjoni, il-Kor esegwixxa diversi innijiet liturġiċi: ‘Misteru Kbir tal-Fidi’ (Introjtu), ‘Mulej Ħniena’ (N. Refalo), ‘Gloria in Excelsis Deo’ (T. Lecot arr. Dion Buhagiar), ‘Mulej Ġejna Qrib Artalek’ (Offertorju), ‘Qaddis’ (M. Palmitessa), Ħaruf t’Alla (N. Refalo), ‘Kull Ħin Imbierek Ismu’ (Tqarbin) u ‘Ismagħha l-Għanja’ (innu tal-għeluq). Fi tmiem din il-Quddiesa, tqassmu l-perlini assoċjati ma’ din il-festa.

Is-servizz li jmiss tal-Kor Nativitas huwa skedat għal nhar il-Ħamis 9 ta’ Frar 2012 f’Marsalforn fl-okkażjoni tas-Solennita’ tan-Nawfraġju tal-Appostlu Missierna San Pawl. Il-Quddiesa Konċelebrata tibda fis-6pm.

Is-Solennita’ tal-Epifanija tal-Mulej

Il-Kor Nativitas temm l-impenji tiegħu relatati mal-festi tal-Milied u l-Ewwel tas-Sena billi anima l-Liturġija tas-Solennita’ tal-Epifanija tal-Mulej – il-ġrajja li fiha nfakkru l-wasla tat-tliet Slaten Maġi li marru mill-bogħod biex jaduraw lill-Mulej u joffrulu d-doni tagħhom ta’ deheb, inċens u mirra.

Fid-9.30am, il-Kor Nativitas anima l-Quddiesa Solenni li tmexxiet minn Patri George Attard. Kif inhi t-tradizzjoni antika fil-Knisja, wara l-Qari tal-Evanġelju, tħabbru l-festi li jimxu mal-Għid. Il-Kor kien akkumpanjat fuq l-orgni mid-Direttur mużikali u organista, Ivan Attard.

Il-Kor Nativitas jagħlaq is-sena 2011 u jiftaħ is-sena 2012 mal-Komunita’ Franġiskana

Il-Kor Nativitas kompla għaddej b’numru sabiħ ta’ impenji marbuta ma’ żmien il-Milied permezz ta’ aktar servizzi fil-Knisja tal-Patrijiet Franġiskani Konventwali tal-Belt Victoria.

Nhar is-Sibt 31 ta’ Diċembru, l-Aħħar Jum tas-Sena Ċivili, il-Kor Nativitas anima l-Quddiesa Konċelebrata tas-6.30pm li kienet immexxija mill-W.R. Patri Joseph Xerri OFM Konv., Gwardjan tal-Komunita’, bis-sehem tal-komunita’ Franġiskana. Kif inhi t-tradizzjoni, fi tmiem din il-Quddiesa, ġie kantat it-Te Deum bħala innu ta’ Radd il-Ħajr lil Alla għall-grazzji li sawwab fuqna matul is-sena li qed tintemm.

L-għada l-Ħadd, 1 ta’ Jannar, l-ewwel jum tas-sena l-ġdida 2012, il-Kor Nativitas reġa’ għal darb’oħra anima l-Quddiesa kantata tas-Solennita’ Liturġika ta’ Marija, Omm Alla. Fid-9.15am ingħata bidu għal servizz ta’ kant ta’ għanjiet tradizzjonali tal-Milied segwit minn Quddiesa Konċelebrata fid-9.30am.

L-aħħar impenn tal-Kor għal dan l-istaġun tal-festi tal-Milied ikun nhar il-Ħadd li ġej, 8 ta’ Jannar 2012, Solennita’ tal-Epifanija tal-Mulej. Fid-9.30am issir Quddiesa Solenni fil-Knisja ta’ San Franġisk. Sadanittant, il-koristi ser ikollhom ikla ta’ dawn il-festi nhar il-Ħamis 5 ta’ Jannar mis-7.00pm ‘il quddiem f’ristorant lokali.

Nieħdu din l-okkażjoni biex nawgurawlkom minn qalbna Sena ġdida mimlija b’kull riżq, hena u barka mis-sema!

Il-Kor Nativitas fil-festi tal-Milied

Matul dawn il-jiem li fihom il-Knisja Universali tiċċelebra b’Solennita’ t-Twelid ta’ Sidna Ġesu’ Kristu, il-Kor Nativitas kien impenjat b’bosta servizzi fil-Knisja tal-Patrijiet Franġiskani Konventwali tal-Belt Victoria. Ta’ min jgħid li l-Kor Nativitas huwa l-kor residenti f’din il-Knisja u, għaldaqstant, huwa għandu l-inkarigu li janima l-Liturġija fil-festi u fis-Solennitajiet il-kbar tal-kalendarju liturġiku.

Bejn it-Tnejn 19 u l-Ġimgħa 23 ta’ Diċembru, il-Kor anima l-Quddiesa tan-Novena tal-Milied. Il-ħsibijiet saru mill-W.R. Dun Joseph Mercieca mill-Parroċċa ta’ San Ġorġ Martri (Victoria). L-omeliji li saru kienu bbażati fuq l-Antifoni maġġuri li l-Liturġija tal-Knisja tkanta waqt it-talba tal-Għasar fil-ferji privileġġjati tal-Avvent, jiġifieri bejn is-17 u t-23 ta’ Diċembru. Dawn jissejħu l-Antifoni ‘O’ peress li kollha kemm huma jibdew b’din il-vokali li turi l-għaġeb ta’ Alla fost il-bnedmin. Għal din l-okkażjoni, il-Kor introduċa repertorju ġdid ta’ Żmien l-Avvent li ntlaqa’ tajjeb ħafna mill-kongregazzjoni miġbura. Dawn kienu jinkludi l-innijiet ‘Iż-Żmien Imħabbar Qorob’, ‘Inħejju t-Triq’ u ‘Ejja Mulej la tiddawwarx!’

Nhar il-Ħadd 25 ta’ Diċembru, Jum il-Milied, il-Kor Nativitas anima l-Liturġija Solenni tat-Twelid tal-Mulej Ġesu’. Fid-9.15am ingħata bidu għal servizz qasir ta’ kant ta’ għanjiet tradizzjonali tal-Milied segwita minn Quddiesa Kantata li kienet preseduta mill-W.R. Patri George Attard OFM Konv, eks-Gwardjan tal-istess komunita’ Franġiskana. Għal din iċ-ċelebrazzjoni, il-Kor esegwixxa l-‘Missa Pastorale’ tas-Surmast Nazzareno Refalo flimkien ma’ diversi għanjiet ta’ Żmien il-Milied. F’dawn l-okkażjonijiet, il-Kor Nativitas kien immexxi mid-Direttur mużikali tiegħu, Ivan Attard, li akkumpanja lill-Kor fuq l-orgni tal-Knisja.

L-impenji tal-Kor Nativitas għal dawn il-festi jkomplu nhar is-Sibt li ġej, 31 ta’ Diċembru, fis-6.30pm fil-Knisja ta’ San Franġisk. Fi tmiem din l-Ewkaristija, jitkanta t-‘Te Deum’ bħala innu ta’ radd il-ħajr lil Alla għall-grazzji li xerred fuqna matul din is-sena 2011 li qed tintemm. Aktar aġġornamenti fil-jiem li ġejjin.

Nawgurawlkom il-kumplament tal-festi t-tajba!

Impenji tal-Kor Nativitas fi zmien il-Milied

Matul dawn il-festi, il-Kor ġie mistieden biex għal sena oħra jagħti numru ta’ servizzi fil-Knisja tal-Patrijiet Franġiskani Konventwali tal-Belt Victoria:

Mit-Tnejn 19 sal-Erbgħa 21 ta’ Diċembru: Novena tal-Milied.

Il-Kor ser janima l-Quddiesa bil-prietka tan-Novena tal-Milied fis-6.30pm.

Il-Ġimgħa 23 ta’ Diċembru: L-aħħar jum tan-Novena tal-Milied.

6.30pm: Quddiesa tal-aħħar jum tan-novena.

Il-Ħadd 25 ta’ Diċembru: Jum il-Milied.

9.15am: Kant ta’ għanjiet tradizzjonali tal-Milied.

9.30am: Konċelebrazzjoni Solenni.

Is-Sibt 31 ta’ Diċembru: L-Aħħar Jum tas-Sena Ċivili.

6.30pm: Quddiesa Kantata li tagħlaq bil-Kant Solenni tat-Te Deum bħala innu ta’ radd il-ħajr lil Alla.

Il-Ħadd 1 ta’ Jannar: Solennita’ ta’ Marija Omm Alla u Jum il-Paċi.

9.15am: Kant ta’ għanjiet tradizzjonali tal-Milied.

9.30am: Konċelebrazzjoni Solenni.

Il-Gimgha 6 ta' Jannar:

Mis-7.30pm ‘il quddiem: Attivita’ soċjali tal-Milied għall-membri kollha tal-Kor Nativitas.

Il-Ħadd 8 ta’ Jannar: Solennita’ tal-Epifanija tal-Mulej.

9.30am: Quddiesa kantata li matulha jitħabbru l-festi li jimxu mal-Għid għas-sena liturġika 2012.

Il-Kor Nativitas jixtieq jawgura lil kulħadd l-isbaħ xewqat

għal Milied hieni u Sena ġdida mimlija b’kull riżq u hena!

Il-Kor Nativitas b’servizz ieħor fis-Santwarju Nazzjonali tal-Madonna Ta’ Pinu

Nhar it-Tlieta 13 ta’ Diċembru 2011, fis-Santwarju tal-Madonna Ta’ Pinu, ġiet iċċelebrata s-Solennita’ tat-80 anniversarju mill-Konsagrazzjoni tal-istess Santwarju. Dan il-maqdes prinċipali tal-gżejjer tagħna ġie ddedikat għall-qima ta’ Alla fit-13 ta’ Diċembru 1931 mill-Isqof Mons. Mikiel Gonzi.

Dan l-anniversarju ġie mfakkar permezz ta’ Quddiesa Konċelebrata li ġiet immexxija mill-W.R. Kan. Dun Eddie Vella flimkien mal-W.R. Dun Gerard Buhagiar, Rettur tas-Santwarju. Il-Kor Nativitas anima din iċ-ċelebrazzjoni. Huwa kien akkumpanjat fuq l-orgni mid-Direttur mużikali, Ivan Attard.